పంజాబ్‌తో పోరు.. ముంబై ఇండియన్స్ కి తొలిసారి కెప్టెన్‌గా బుమ్రా

ధర్మశాలలోని హిమాచల్ ప్రదేశ్ క్రికెట్ అసోసియేషన్ స్టేడియం వేదికగా పంజాబ్ కింగ్స్‌తో మ్యాచ్‌లో ముంబై ఇండియన్స్ టాస్ గెలిచి ఫీల్డింగ్ ఎంచుకుంది. రెగ్యులర్ కెప్టెన్ హార్దిక్ పాండ్యా గాయం నుంచి ఇంకా పూర్తిగా కోలుకోకపోవడం, స్టార్ బ్యాటర్ సూర్యకుమార్ యాదవ్ వ్యక్తిగత కారణాలతో అందుబాటులో లేకపోవడంతో, స్టార్ పేసర్ జస్‌ప్రీత్ బుమ్రా తొలిసారిగా ముంబై జట్టుకు సారథ్యం వహిస్తున్నాడు.

టాస్ గెలిచిన అనంతరం బుమ్రా మాట్లాడుతూ... "చల్లని వాతావరణం కారణంగా పిచ్ బౌలింగ్‌కు అనుకూలిస్తుందని భావించి ఈ నిర్ణయం తీసుకున్నాం. మిగిలిన మూడు మ్యాచ్‌లలో స్వేచ్ఛగా ఆడి, కొన్ని జట్ల అవకాశాలను దెబ్బతీస్తాం" అని తెలిపాడు. మరోవైపు, పంజాబ్ కెప్టెన్ శ్రేయస్ అయ్యర్ మాట్లాడుతూ, తాము కూడా బౌలింగ్ తీసుకోవాలనే అనుకున్నామని చెప్పాడు. పంజాబ్ జట్టు మూడు మార్పులతో బరిలోకి దిగుతోంది. హర్‌ప్రీత్ బ్రార్, జేవియర్ బార్ట్‌లెట్, అజ్మతుల్లా ఒమర్జాయ్‌లకు తుది జట్టులో చోటు దక్కింది.

ఈ ఐపీఎల్ సీజన్‌లో పంజాబ్ కింగ్స్ ప్రస్థానం ఆరంభంలో అద్భుతంగా సాగింది. తొలి ఏడు మ్యాచ్‌లలో ఆరు గెలిచి పటిష్ఠంగా కనిపించినా, ఆ తర్వాత వరుసగా నాలుగు మ్యాచ్‌లలో ఓడిపోయి ప్లేఆఫ్స్ అవకాశాలను సంక్లిష్టం చేసుకుంది. ప్రస్తుతం 11 మ్యాచ్‌లలో 13 పాయింట్లతో నాలుగో స్థానంలో ఉన్న పంజాబ్‌కు ఈ మ్యాచ్ గెలవడం అత్యంత కీలకం. 

మరోవైపు, ముంబై ఇండియన్స్ ఇప్పటికే ప్లేఆఫ్స్ రేసు నుంచి నిష్క్రమించింది. 11 మ్యాచ్‌లలో కేవలం 6 పాయింట్లతో తొమ్మిదో స్థానంలో ఉన్న ముంబై, మిగిలిన మ్యాచ్‌లలో గెలిచి గౌరవంగా టోర్నీని ముగించాలని చూస్తోంది.

జట్ల వివరాలు:

ముంబై ఇండియన్స్: రియాన్ రికెల్టన్ (wk), నమన్ ధీర్, తిలక్ వర్మ, షెర్ఫేన్ రూథర్‌ఫోర్డ్, విల్ జాక్స్, రాజ్ బావా, కార్బిన్ బాష్, దీపక్ చాహర్, శార్దూల్ ఠాకూర్, జస్‌ప్రీత్ బుమ్రా (c), రఘు శర్మ. 
ఇంపాక్ట్ సబ్స్: రోహిత్ శర్మ, మయాంక్ రావత్, రాబిన్ మింజ్, క్రిష్ భగత్, ట్రెంట్ బౌల్ట్.

పంజాబ్ కింగ్స్: ప్రభ్‌సిమ్రాన్ సింగ్ (wk), ప్రియాన్ష్ ఆర్య, కూపర్ కనోలీ, శ్రేయస్ అయ్యర్ (c), సూర్యాంశ్ షెడ్గే, శశాంక్ సింగ్, అజ్మతుల్లా ఒమర్జాయ్, మార్కో జాన్సెన్, జేవియర్ బార్ట్‌లెట్, అర్ష్‌దీప్ సింగ్, యజువేంద్ర చాహల్. 
ఇంపాక్ట్ సబ్స్: హర్‌ప్రీత్ బ్రార్, విజయ్‌కుమార్ వైశక్, మిచెల్ ఓవెన్, ప్రవీణ్ దూబే, విష్ణు వినోద్.